Regjisori dhe aktori i njohur amerikan Rob Reiner, 78 vjeç, dhe bashkëshortja e tij Michele Singer Reiner, 68 vjeçe, u gjetën të vdekur në shtëpinë e tyre në Los Angeles të dielën, më 14 dhjetor. Sipas People Magazine, shërbimet e emergjencës u thirrën rreth orës 15:30, por me mbërritjen në vendngjarje u konstatua se të dy kishin ndërruar jetë. Autoritetet kanë konfirmuar gjetjen e trupave, por nuk kanë dhënë ende detaje zyrtare mbi rrethanat e vdekjes apo shkakun përfundimtar.
Sipas burimeve ekskluzive të cituara nga People, djali i çiftit, Nick Reiner, 32 vjeç, dyshohet se ka qenë i përfshirë në ngjarje dhe aktualisht po merret në pyetje nga policia. Deri tani, nuk ka arrestime dhe as konfirmim zyrtar nga autoritetet, ndërsa hetimi është në vazhdim. Nick Reiner ka folur publikisht në të kaluarën për betejën e tij shumëvjeçare me varësinë nga droga dhe periudha të gjata të jetës si i pastrehë, çështje që i ka trajtuar edhe në projekte artistike.
Lajmi ka tronditur komunitetin e Hollivudit dhe publikun e gjerë, duke rikthyer vëmendjen te figura e Rob Reiner-it, një nga regjisorët më të rëndësishëm të kinemasë amerikane. Reiner u bë fillimisht i famshëm si aktor në serialin All in the Family, përpara se të ndërtonte një karrierë të jashtëzakonshme si regjisor, me filma që sot konsiderohen klasikë modernë dhe që kanë lënë gjurmë të thella kulturore.
Filmat e Rob Reiner si regjisor
Rob Reiner ka realizuar këta filma, të renditur kronologjikisht:
This is spinal tap (1984)
The sure thing (1985)
Stand by me (1986)
The Princess Bride (1987)
When Harry met Sally… (1989)
Misery (1990)
A few good men (1992)
North (1994)
The American President (1995)
Ghosts of Mississippi (1996)
The story of us (1999)
Alex & Emma (2003)
Rumour has it… (2005)
The bucket list (2007)
Flipped (2010)
The magic of Belle Isle (2012)
And so it goes (2014)
Being Charlie (2015)
LBJ (2016)
Shock and awe (2017)
Këto vepra dëshmojnë shtrirjen e gjerë artistike të Reiner-it, i cili ka lëvizur me sukses mes komedisë, dramës, thriller-it psikologjik dhe filmit politik, duke fituar vlerësimin e kritikës dhe dashurinë e publikut ndër breza.
