Që pas vendimit të parë për të hyrë në karantinë në nivel kombëtar, ajo që dihej me siguri ishte se në dalje gjërat nuk do të ishin më si më parë. Qëndrimi në shtëpi, shkëputja nga puna dhe jeta sociale, do të këpusnin në mes jetët tona normale duke na çuar drejt asaj që sot quhet ‘normaliteti i ri’ apo ‘normaliteti tjetër’. E gjithë bota po lëviz drejt një normaliteti të ri; çfarë do të konsiderohet normale në vijim, as nuk ishte menduar më parë…
Të qëndruarit në shtëpi për më shumë se një muaj e ndryshoi ritmin e jetëve tona. Ritimi u ngadalësua. Rutina të reja u zhvilluan. Puna nga shtëpia u bë domosdoshmëri. Çiftet, e detyruar të qëndrojnë brenda të njëjtës hapësirë ditë pas dite, mësuan të krijojnë hapësira për njëri- tjetrin, (ose nuk mësuan dot). Më të vjetrit, më parë tepër hezitues për blerjet online, kuptuan se aplikacionet fare të thjeshta në përdorim, ta bënin blerjen online të lehtë pupël.
Njerëzit edhe aktualisht në karantinim të moderuar po kalojnë më shumë kohë në shtëpi, por si po e përdorin ata kohën ekstra të qëndrimit në shtëpi krahasuar me më parë? A po e zbulojnë shqiptarët kënaqësinë e të bërit të gjërave vetë në lidhje me mobilimin dhe rregullimin e shtëpive? Kuptohet që kemi më shumë kohë në dispozicion për ‘pastrimet e pranverës’ dhe tani që higjena është vendosur në plan të parë, mundësitë për të blerë më shumë produkte higjene, për të parë më shumë video me truke pastrimi, janë rritur. A do të shpenzojnë konsumatorët më shumë kohë për kujdesin ndaj vetes dhe për rutinën e bukurisë? Me gjasa, po.
Të mërzitur me leximin e artikujve të shkurtër, në kushtet e kohës së bollshme, njerëzit i kthehen dëshirës për tekste me të gjata dhe librave të mbetur pa lexuar në rafte. Gjejnë kohë për vizatim, piktura, punë dore etj.
Edhe pse blerjet online janë shtuar, sjellja ndaj blerjeve edhe në vijim do të ngadalësohet si pasojë e dëshirës për të kërkuar eksperienca blerje me më shumë kuptim.
Me blerjet e kufizuara, familjet po gatuajnë vetë receta të reja, duke marrë frymëzim nga videot online.
Dhe pasi çdo gjë është gatuar, pastruar, shijuar, çfarë mbetet tjetër për tu bërë në shtëpi për të hequr mërzinë… Ndoshta dëshira për fëmijë do të jetë një tjetër sjellje e cila do të rinojë popullsinë…
Gatimi në shtëpi dhe ndryshimi i strategjive në blerje do ti bëjnë konsumatorët të vlerësojnë më shumë atë që ata kanë, duke çuar në më pak mbeturina. Ndoshta më pak ushqime nga restorantet drejt shtëpive dhe më pak materiale për tu hedhur në plehra. Vizitat të rralla në qendrat tregtare do të çojnë në më pak blerje impulsive që lidhen me modën, dhe si rrjedhim do të ndryshojë kulturën e ‘hedhjes’ që ka predominuar më parë.
Bizneset që do të funksionojnë më mirë janë ato që përmbushin një nevojë njerëzore bazike dhe kjo vlen shumë për inovacionin. Njerëzit do të vazhdojnë në ushqehen, flenë, punojnë, por ata do të kenë strategji të re të blerjeve dhe konsiderime të reja mbi nevojën për produkte. Ky tipar mund të orjentojë inovacionin drejt dobisë duke ulur fuqinë e markës. Si rrjedhim, vendet me ekonomi të orjetuar drejt funksionalitetit do ta ndjejnë më pak dëmin e normalitetit të ri, duke përfshirë kulturën aziatike të konsumit.
Një studim i bërë nga MINTEL, tregon se ¾ e konsumatorëve në Azi-Paqësor bien dakord se ata po e gjejnë veten me më shumë dëshirë për të mësuar më shumë mbi gjërat që ata bënin, (psh markat, çështjet sociale, etj). Kjo tregon mbi nevojën për burime të besueshme informacioni që luftojnë lajmet e rreme. Ky është momenti kur markat mund të ofrojnë jo thjesht ndërveprim njerëzor por edhe autoritetin e ekspertit. Ndërsa konsumatorët kërkojnë më shumë bashkëpunim për të dalë nga kriza, ata do të presin nga markat që të punojnë me komunitetet dhe brenda komuniteteve për të krijuar zgjidhje për problemet sociale, nga përhapja e virusit tek ndryshimi i klimës dhe siguria ushqimore.
Një nga çështjet kryesore që i shqetëson markat është mënyra se si ato do ta pozicionojnë veten përballë konsumatorit në dritën e pandemisë COVID-19. Në një periudhë krize kompanitë nuk duan të duken oportuniste. Asnjë markë nuk dëshiron të duket ‘fituese’ në një kohë kur konsumatorët po vuajnë panikun.
Trendi i parë më i dukshëm për të gjithë është të punuarit nga shtëpia veshur me të brendëshme. Shumë nga miqtë e mi më kanë treguar se si kanë qenë në mbledhjet online të veshur me xhaketa në pjesën e sipërme të trupit, aty ky duken përtej kameras, dhe me mbathje poshtë në pjesën e padukshme nga kamera. Shoqëria gradualisht po bëhet më e shkujdesur në raport me dukjen. Gjithashtu shumë video komunikime online i kanë gjetur femrat me më pak make up. Vija ndarëse mes lojës dhe punës është holluar shumë duke qenë se ato ndodhnin në të njëjtin ambjent, dhe të gjitha bisedat e punës u zhvendosën në shtëpi. Kolegët njohin tani pjesë të jetës personale të njëri-tjetrit prej Zoom-it dhe publiku di se si duket shtëpia e shumë personazheve të njohur të cilët janë në lidhje direkte me studiot duke krijuar kështu një intimitet i ri. Veshjet kanë shkuar drejt të rehatshmeve dhe markat të cilat bëjnë më shumë punë ndërkohë janë ato që krijojnë komoditet. Edhe kur situata të shkojë drejt normales dhe dëshira për tu veshur mirë do të rikthehet, do të jetë e vështirë që këto elementë të veshjes casual të eleminohet plotësisht. Vlera e rehatisë, fizike dhe psikologjike, do të jetë prioritet. Koncepti i formalitetit do të lëvizë nga ritualet dhe autoriteti drejt mirësjelljes dhe empatisë, duke qenë ‘më human’. Gjatë karantinës u vu re një ulje e reklamimeve në mediat sociale të produkteve të luksit. Përveç faktit të qëndrimit në shtëpi me veshje komode, shumë nga konsumatorët kanë shqetësime ekonomike në lidhje me të ardhurat e tyre në të ardhmen. Këto motive do të ndikojnë zhvillimin e industrisë së modës, në të cilën veshjet luksoze do të bëjnë një hap pas për ti lënë vend stilit më miqësor ndaj sportivitetit.
Sipas heuritech.com, publikimet në mediat sociale, si Instagram, tentuan që ta mbanin gjallë me postime modën. Ndërkohë konsumatorët po bëhen me të ndërgjegjësuar ndaj natyrës në zakonet e tyre të modës. Covid-19 mund të jetë një moment historik për modën e qëndrueshme. Konsumatorët po i japin më shumë vëmendje prodhuesve të vegjël, dizajnërve të pavarur, po blejnë më pak dhe blejnë veshje të bëra nga materiale të qëndrueshme. Falë konsumatorëve të cilët po shkojnë drejt modës më të qëndrueshme, industria post-Covid do të thotë vërtet pyje dhe kullota më të gjelbërta.
Profesor Byron Sharp (i Marketing Science në University of South Australia) thotë se kur vjen fjala tek përdorimi i produkteve dhe besnikëria, sjellja është një orjentues i fuqishëm i ndërgjegjes, perceptimeve dhe qëndrimeve, që do të thotë se sjellja aktuale e konsumatorit, dhe pse jonormale sipas standarteve të tyre, do të impaktojë ndjenjat e konsumatorëve ndaj markave kur të jemi në anën tjetër të krizës.
Markat e reja do të ndjekin lëvizjet e mëdha të pritshmërive të konsumatorëve dhe do të veprojnë në përputhe me to duke e pozicionuar veten në realitetin e ri post-koronavirus.
Ky koment i profesorit Sharp, thekson elementët e ripozicionimit të markave të ndryshme të cilave do tu duhet që këto muaj të vëzhgojnë tregun dhe të hartojnë strategjinë e ripozicionimit në përputhje me realitetin e ri. /mendimi.al
