Riyadhi heq kufizimet dhe lejon hyrjen e kapitalit global drejtpërdrejt në bursë duke nisur nga 1 shkurti.
Arabia Saudite ka njoftuar një ndryshim historik në bursat e saj financiare, duke konfirmuar se nga 1 shkurti çdo investitor i huaj do të mund të marrë pjesë drejtpërdrejt në tregun saudit. Autoriteti i Tregjeve të Kapitalit bëri të ditur se po hiqet koncepti i investitorit të kualifikuar, një rregull që lejonte hyrjen vetëm të investitorëve ndërkombëtarë të përzgjedhur dhe me akses të vazhdueshëm në treg.
Sipas autoriteteve saudite, ky hap pritet të rrisë flukset e kapitalit nga jashtë, të sjellë më shumë likuiditet dhe të nxjerrë bursën saudite në një nivel konkurrues ndërkombëtar. Tregu saudit është pjesë qendrore e vizionit ekonomik të vendit për të reduktuar varësinë nga nafta dhe për të diversifikuar ekonominë drejt sektorëve si teknologjia, industria e shërbimeve dhe financat.
Nisma plotëson një sërë reformash të ndërmarra vitet e fundit, përfshirë krijimin e fondeve të përbashkëta me partnerë në Japoni dhe Hong Kong, si dhe hapjen e tregut të pasurive të paluajtshme të listuara edhe për investitorë të huaj. Sidoqoftë, Arabia Saudite vazhdon të kufizojë pronësinë e drejtpërdrejtë të tokës në Mekë dhe Medinë.
Edhe pse ishte një pritje e gjatë, analistët theksojnë se shumica e investitorëve institucionalë të mëdhenj tashmë kishin akses në treg. Megjithatë, ndryshimi eliminoi barrierat e mbetura formale, duke sinjalizuar një hap të qartë drejt liberalizimit financiar.
Bankat dhe fondet ndërkombëtare po ndjekin gjithashtu një zhvillim tjetër të rëndësishëm: heqjen e kufirit prej 49 përqind në pronësinë e huaj të kompanive të listuara. Ky vendim nuk pritet para gjysmës së dytë të vitit, por do të ndryshojë rrënjësisht mënyrën se si kapitali ndërkombëtar mund të hyjë në tregun saudit.
Pavarësisht reformave, tregu i aksioneve saudite ka pësuar rënie vitin e kaluar, duke humbur më shumë se 12 përqind. Hapja për të huajt shihet si një lëvizje për të rigjallëruar interesin në bursën më të madhe të botës arabe dhe për të rritur besimin e investitorëve globalë në tranzicionin ekonomik të vendit.
