Arrihet marrëveshja historike e tregtisë pas 25 vitesh negociatash
Pas më shumë se 25 vitesh diskutimesh dhe bllokimesh politike, Bashkimi Europian ka dhënë miratimin e tij të shumëpritur për marrëveshjen tregtare me bllokun Mercosur që përfshin Brazilin, Argjentinën, Paraguajin dhe Uruguain, duke krijuar potencialisht zonën më të madhe të tregtisë së lirë në botë, që përfshin mbi 700 milionë banorë.
Vendimi u mor në bazë të votimeve të shumicës të shteteve anëtare të BE-së, pavarësisht kundërshtimeve të forta nga Franca, Polonia, Austria, Irlanda dhe Hungaria, ndërsa Belgjika abstenoi. Italia votoi pro, pasi muajin e kaluar kishte kërkuar shtyrje të votimit.
Sipas diplomatëve europianë, marrëveshja përfshin edhe mekanizma mbrojtës për fermat europiane, të cilët do të aktivizohen automatikisht nëse importet bujqësore nga Amerika Latine rriten më tepër se sa parashikohet, një detaj i rëndësishëm për vendet që i frikësohen konkurrencës së produkteve bujqësore nga Brazili dhe Argjentina.
Nga këndvështrimi i BE-së, marrëveshja shënon një fitore gjeopolitike, duke penguar rritjen e ndikimit të Kinës në Amerikën Latine dhe duke ofruar stabilitet tregtar në një kohë kur presidenti amerikan Donald Trump po rrit barrierat doganore në nivel global.
Sektorët europianë që pritet të përfitojnë më shumë nga ulja e tarifave përfshijnë automobilistikën, aviacionin, makineritë industriale dhe eksportet bujqësore premium si vera dhe djathi.
Pas miratimit të ambasadorëve të BE-së, presidentja e Komisionit Europian Ursula von der Leyen pritet të udhëtojë në Paraguaj javën e ardhshme për nënshkrimin zyrtar, megjithëse komisioni nuk e ka konfirmuar ende publikisht datën.
Më pas, marrëveshja duhet të ratifikohet nga Parlamenti Europian dhe disa parlamente kombëtare për pjesët që shkojnë përtej politikës tregtare klasike.
Kjo marrëveshje u përditësua në vitin 2025 për të shtuar miliarda euro mbështetje për fermerët europianë, një nga pengesat kryesore që e kishte mbajtur të ngrirë marrëveshjen për më shumë se dy dekada.
