Një ese e gjatë dhe alarmuese e publikuar këtë javë nga Matt Shumer, CEO i Hyperwrite, ka shkaktuar jehonë të jashtëzakonshme në rrjetet sociale dhe në komunitetin global të teknologjisë. Me mbi 40 milionë shikime në platformën X brenda pak orësh, Shumer paralajmëron se inteligjenca artificiale po hyn në një fazë transformuese që do të ndryshojë shoqërinë dhe tregun e punës më thellë sesa pandemia e COVID-19.
Në esenë me titull “Diçka e madhe po vjen”, Shumer shkruan se inteligjenca artificiale tashmë është në gjendje të kryejë të gjithë punën e tij teknike si drejtues i një kompanie teknologjike – dhe sipas tij, kjo nuk është më një parashikim për të ardhmen, por një realitet që po ndodh tani. “Nuk po bëjmë parashikime,” shkruan ai. “Po ju tregojmë çfarë ka ndodhur tashmë në punët tona – dhe po ju paralajmërojmë se radha juaj po vjen.”
Sipas Shumer, arsyeja pse njerëzit në teknologji “po ngrenë alarmin” është sepse ata janë të parët që po përjetojnë drejtpërdrejt këtë ndryshim. Ai thekson se shumë njerëz jashtë industrisë e kanë nënvlerësuar IA-n pas përvojave zhgënjyese me versionet e hershme të modeleve gjuhësore, por kjo epokë ka marrë fund. Modelet aktuale, sipas tij, janë “të panjohura” krahasuar me ato të vetëm gjashtë muajve më parë.
Shumer e krahason momentin aktual me shkurtin e vitit 2020, kur paralajmërimet për një virus të ri u shndërruan shumë shpejt në një krizë globale. “Potenciali i asaj që do të ndryshojë IA është shumë më i madh se COVID-i,” shkruan ai, duke shtuar se ky është ndoshta viti më i rëndësishëm i karrierës për shumë profesionistë.
Në vend që të mbillet panik, Shumer u bën thirrje njerëzve të njihen sa më thellë me inteligjencën artificiale. Ai argumenton se ekziston ende një “dritare e shkurtër” ku shumica e kompanive po e injorojnë këtë transformim. Në këtë kontekst, punonjësi që hyn në një takim dhe thotë “e bëra këtë analizë për një orë me IA, në vend të tre ditëve”, do të jetë menjëherë personi më i vlefshëm në sallë.
Paralajmërimi i Shumer nuk është i izoluar. Dario Amodei, CEO i Anthropic, ka deklaruar se IA mund të eliminojë deri në gjysmën e vendeve fillestare të punës brenda një deri në pesë viteve të ardhshme. Ndërkohë, Elon Musk ka paralajmëruar se çdo punë që nuk përfshin punë fizike është veçanërisht e ekspozuar ndaj automatizimit të shpejtë nga IA.
Për Shumer, momenti i kthesës personale erdhi pas publikimit të modeleve të reja për inxhinieri softuerike nga OpenAI dhe Anthropic. Ai përshkruan përvojën e tij me modelet më të fundit si tronditëse: IA nuk po ndjek më thjesht udhëzime, por po merr vendime inteligjente, duke demonstruar diçka që ai e përshkruan si “gjykim” dhe “shije profesionale”. Sipas tij, tani mjafton t’i thuash agjentit çfarë dëshiron dhe të largohesh nga kompjuteri për disa orë – puna kthehet e përfunduar dhe e bërë mirë.
Eseja është përshëndetur nga figura të njohura të industrisë teknologjike. Alexis Ohanian, bashkëthemelues i Reddit, e cilësoi shkrimin si “një analizë shumë të fortë”, ndërsa David Haber e përshkroi atë si këshillë praktike për këdo që dëshiron të ecë përpara në një kompani të madhe sot.
Megjithatë, jo të gjithë janë plotësisht të bindur. Disa përdorues kanë vënë në dukje se produktet aktuale të IA ende vuajnë nga pasaktësi dhe “halucinacione”. Vetë Shumer e pranon këtë, por thekson se kufizimet aktuale nuk duhet të ngatërrohen me drejtimin e përgjithshëm të teknologjisë.
Në një postim të mëvonshëm në LinkedIn, Shumer shkroi se për një kohë të gjatë u ka dhënë njerëzve “përgjigjen e sigurt” kur e pyesnin për IA-në, sepse e vërteta tingëllonte e pabesueshme. “Kam mbaruar me këtë,” shkroi ai. “Njerëzit që më interesojnë meritojnë të dëgjojnë se çfarë po vjen.”
