Këtë vit, Eurovisioni rikthehet me shumë entuziazëm dhe pritet të jetë një nga edicionet më të larmishme dhe të debatueshme të viteve të fundit. Pas një viti pritjeje, qyteti i Bazelit në Zvicër është kthyer në qendër të vëmendjes ndërkombëtare, duke mirëpritur 26 shtete që do të garojnë në finalen madhështore të së shtunës.
Nga performancat plot energji dhe skenografitë ekstravagante te baladat prekëse dhe temat provokuese, Eurovision 2025 ofron një spektakël të shumëpritur. Pas fitores së vitit të kaluar nga Zvicra me këngën ‘The Code’ të këngëtarit Nemo, këtë vit konkurrenca duket më e fortë se kurrë. Nemo, i cili ka fituar zemrat e publikut me stilin e tij unik pop-operatik, thekson se ky vit është ‘plot energji dhe pasion’.
CNN thotë se një surprizë e madhe vjen nga Shqipëria me grupin ‘Shkodra Elektronike’ dhe këngën ‘Zjerm’, e cila ka arritur të tërheqë vëmendjen e shumë fansave. Performanca e tyre, që ndërthur elemente tradicionale dhe moderne, është vlerësuar si unike dhe plot dinamizëm. Beatriçe Gjergji, një nga anëtarët e grupit, shprehet: ‘Emocionet janë të fuqishme, skena është gjigande dhe presioni… i madh.’ Ajo pranon se nuk janë ndjekës të mëdhenj të muzikës së Eurovisionit, por kjo qasje duket se i ka bërë edhe më tërheqës për publikun. Shqipëria do të performojë e fundit në garën e sotme, duke siguruar një përmbyllje të fuqishme të mbrëmjes.
Një tjetër moment interesant është se dje në Shqipëri u zhvillua Samiti i Europës, një ngjarje e rëndësishme për kontinentin. Gjatë këtij eventi, kënga u luajt instrumentalisht gjatë samitit, duke sjellë një prekje tradicionale dhe autentike në atmosferë.
Një tjetër konkurrent që po tërheq vëmendje është JJ nga Austria me këngën ‘Wasted Love’. Interpretimi i tij mbresëlënës dhe vokali operistik kanë krijuar një paralelizëm me këngën fituese të vitit të kaluar. Megjithatë, ngjashmëria me ‘The Code’ ka ngjallur dyshime nëse do të arrijë të marrë mbështetjen e duhur.
Ndërkohë, Erika Vikman nga Finlanda po bën bujë me këngën ‘Ich Komme’, një hit provokativ që eksploron fuqinë dhe seksualitetin. Performanca e saj plot guxim ka marrë shumë mbështetje nga publiku.
Përfaqësuesit e Suedisë, grupi KAJ me këngën ‘Bara Bada Bastu’, kanë sjellë në skenë një atmosferë unike me një saunë gjigante në sfond. Mesazhi i tyre për përfitimet shëndetësore të saunës ka ngjallur debat, por edhe duartrokitje të zjarrta.
Finalja e madhe e Eurovision 2025 pritet të jetë një spektakël plot ngjyra, pasion dhe performanca unike. Mbetet për t’u parë nëse Shqipëria do të arrijë të sjellë fitoren historike në këtë kompeticion të famshëm europian.
