Gazetarët e Financial Times kanë publikuar parashikimet e tyre për vitin 2026, duke e përshkruar atë si një vit edhe më të paparashikueshëm politikisht dhe ekonomikisht.
Rikthimi i Donald Trump në Shtëpinë e Bardhë ka shtuar pasigurinë globale, ndërsa tensionet gjeopolitike, zhvillimet në inteligjencën artificiale dhe ndryshimet në ekonominë botërore pritet të formësojnë vitin e ardhshëm.
Sipas FT, tarifat tregtare të Trumpit ka gjasa të mos rriten më tej, ndërsa lufta në Ukrainë pritet të vazhdojë pa një marrëveshje paqeje që do ta detyronte Volodymyr Zelenskyy të heqë dorë nga Donbasi.
Në SHBA, parashikohet që demokratët të rifitojnë kontrollin e Dhomës së Përfaqësuesve në zgjedhjet e mesmandatit, duke bllokuar pjesërisht agjendën e Trumpit. Ndërkohë, bankat qendrore ka gjasa të vazhdojnë uljen e normave të interesit, ndërsa çmimi i arit mund të kalojë pragun simbolik prej 160 dollarësh për gramë.
Në fushën e teknologjisë, Financial Times parashikon se “flluska e AI-së” do të fillojë të shfryhet, me humbje për investitorët dhe kompani më të vogla, edhe pse gjigantët e teknologjisë do të mbeten të qëndrueshëm. Robotët humanoidë pritet të hyjnë gradualisht në shtëpitë e njerëzve, por kryesisht për përdorues të pasur dhe në fazë eksperimentale. Një kompjuter kuantik plotësisht funksional komercial ende nuk pritet në 2026, por zhvillimet do të përshpejtohen.
Në planin global, Afrika mund të rritet ekonomikisht më shpejt se Azia, Arabia Saudite nuk pritet të normalizojë marrëdhëniet me Izraelin, ndërsa Brazili ka gjasa të mbajë Luiz Inácio Lula da Silva në pushtet për një mandat të katërt.
Në thelb, parashikimi i Financial Times për 2026 është i qartë: bota do të jetë më e fragmentuar, më teknologjike dhe më e pasigurt, duke kërkuar përshtatje të shpejtë si nga qeveritë, ashtu edhe nga shoqëritë.
