Vatikani ka konfirmuar sot ndarjen nga jeta të Papa Françeskut, në orën 07:35 të mëngjesit, me orën lokale, në rezidencën e tij në Casa Santa Marta. Ai ndërroi jetë të hënën e Pashkëve, më 21 prill 2025, në moshën 88-vjeçare, duke lënë pas një trashëgimi të thellë shpirtërore, humane dhe historike.
Nga Buenos Aires në fronin e Shën Pjetrit
I lindur më 17 dhjetor 1936 në Buenos Aires, Argjentinë, me emrin Jorge Mario Bergoglio, ai ishte Papa i parë nga Amerika Latine dhe Papa i parë jo-europian në më shumë se 1,200 vjet. Po ashtu, ai ishte Papa i parë jezuit në histori. Përpara shugurimit, ai ka punuar si roje nate në klube dhe më pas si kimist. Kjo rrugë e pazakontë drejt fronit të Selisë së Shenjtë e bëri figurën e tij të veçantë dhe afër njerëzve të thjeshtë.
Papa i përulur dhe i afërt me të varfrit
Papa Françesku u njoh për përulësinë e tij, përkushtimin ndaj të varfërve dhe guximin për të folur për paqen, drejtësinë sociale dhe mbrojtjen e ambientit. Ai ishte një zë i fortë për emigrantët, të pastrehët dhe të gjithë ata që shoqëria i lë në harresë.
Presidenti francez Emmanuel Macron e quajti atë “një njeri përulës, në anën e më të dobëtëve”, ndërsa Presidentja e Komisionit Evropian, Ursula von der Leyen, u shpreh se “ai frymëzoi miliona njerëz me dashurinë e tij të pastër”.
Vitet e fundit të jetës dhe gjendja shëndetësore
Muajt e fundit të jetës, Papa Françesku u përball me probleme të rënda shëndetësore. Ai kaloi disa javë në spital për shkak të pneumonisë dhe u lirua vetëm një muaj më parë. Për shkak të një operacioni në mushkëri gjatë rinisë, ai ishte veçanërisht i ndjeshëm ndaj infeksioneve respiratore.
Megjithatë, vetëm një ditë para vdekjes, ai u shfaq në sheshin e Shën Pjetrit për bekimin e Pashkëve, duke përshëndetur me buzëqeshje besimtarët.
Bota i jep lamtumirën një njeriu të paqes
Liderë nga e gjithë bota kanë shprehur ngushëllime. Kryeministrja italiane Giorgia Meloni tha se “një njeri i madh ka lënë këtë botë”, ndërsa Kryeministri spanjoll Pedro Sánchez u shpreh se “angazhimi i tij për paqen dhe për më të brishtët ka lënë një trashëgimi të thellë”.
Në fjalën e tij të fundit, Papa theksoi se “nuk ka paqe pa liri të fesë, të mendimit dhe të shprehjes”, duke kujtuar viktimat e luftërave dhe duke bërë thirrje për armëpushim në Gaza dhe Ukrainë.
Ceremonia e varrimit
Papa Françesku do të varroset në Bazilikën e Shën Marisë së Madhe në Romë, duke u bërë Papa i parë në më shumë se një shekull që nuk do të prehet brenda Vatikanit. Ai kishte kërkuar një ceremoni të thjeshtë dhe një arkivol prej druri, në përputhje me përulësinë që e karakterizoi gjatë gjithë jetës së tij.
Pusho në paqe, Papa Françesk. Trashëgimia jote do të jetojë në zemrat e miliona njerëzve anembanë botës.
