Organizata Botërore e Shëndetësisë thotë se vdekjet nga koronavirusi në Evropë u rritën me 5% javën e fundit, duke e bërë atë rajonin e vetëm në botë ku vdekjet nga COVID-19 u rritën shkruan AP.
Agjencia shëndetësore e KB tha se rastet e konfirmuara u rritën me 6% globalisht, të nxitura nga rritjet në Amerikë, Evropë dhe Azi. Në raportin e saj javor mbi pandeminë të lëshuar vonë të martën, OBSH tha se vdekjet nga COVID-19 në të gjitha rajonet përveç Evropës mbetën të qëndrueshme ose ranë, dhe arritën në 50,000 në mbarë botën javën e kaluar.
Nga 3.3 milionë infeksione të reja të raportuara, 2.1 milionë erdhën nga Evropa. Ishte java e shtatë radhazi që rastet e COVID-19 vazhduan të rriteshin në 61 vende dhe territore që OBSH numëron në rajonin e saj evropian, i cili shtrihet përmes Rusisë deri në Azinë Qendrore. Ndërsa rreth 60% e njerëzve në Evropën Perëndimore janë plotësisht të imunizuar kundër COVID-19, vetëm rreth gjysma e tyre janë vaksinuar në pjesën lindore të kontinentit, ku zyrtarët po luftojnë për të kapërcyer hezitimin e përhapur të vaksinave thuhet më tej në artikull.
OBSH tha se infeksionet kanë rënë në Afrikë, Lindjen e Mesme dhe Azinë Juglindore që nga korriku. Brenda Evropës, OBSH tha se numri më i lartë i rasteve të reja ishte në Rusi, Gjermani dhe Britani. OBSH vuri në dukje se vdekjet u rritën me 67% në Norvegji dhe me 38% në Sllovaki. Agjencia shëndetësore e përshkroi më parë Evropën si epiqendrën e pandemisë në vazhdim dhe paralajmëroi se mund të ketë 500,000 vdekje të tjera deri në shkurt nëse nuk ndërmerren veprime urgjente në kontinent.
Javën e fundit, Austria ka vendosur kufizime të rrepta në lëvizjen e njerëzve të pavaksinuar, Holanda dhe disa vende të tjera evropiane kanë rifutur masat e izolimit në përpjekje për të ngadalësuar infeksionet dhe Mbretëria e Bashkuar vendosi të përdorë doza përforcuese për të gjithë mbi 40 vjeç.
Burimi: AP
