Një nga demonstratat më të mëdha në Izrael që nga tetori 2023, me thirrje për kthimin e pengjeve dhe ndalimin e ofensivës ushtarake
Qindra mijëra qytetarë u mblodhën të dielën në Tel Aviv për të kërkuar përfundimin e luftës në Gaza dhe lirimin e pengjeve, një nga protestat më të mëdha në Izrael që nga shpërthimi i konfliktit në tetor 2023.
Tubimi masiv, i cili kulmoi një ditë të tërë protestash kombëtare dhe një greve të përgjithshme, u zhvillua në të ashtuquajturën Sheshi i Pengjeve, që prej muajsh është bërë epiqendra e manifestimeve kundër qeverisë. Sipas Forumit të Familjeve të Pengjeve dhe të Zhdukurve, rreth 500 mijë persona morën pjesë vetëm në Tel Aviv, një shifër që nuk u konfirmua nga policia.
“Ne kërkojmë një marrëveshje të plotë dhe të arritshme, dhe mbi të gjitha, fundin e luftës,” deklaroi Einav Zangauker, një nga figurat kryesore të lëvizjes, e cila ka djalin peng në Gaza. Në media u publikua edhe një video e filmuar nga Hamasi ku i biri, i dobësuar dhe i rraskapitur, i dërgonte mesazh familjes së tij.
Tensionet brenda Izraelit
Protestuesit bllokuan rrugë, ndezën goma dhe u përplasën me policinë. Më shumë se 30 persona u arrestuan. Kryeministri Benjamin Netanyahu kritikoi protestat duke thënë se “ato vetëm forcojnë qëndrimin e Hamasit dhe e zgjasin vuajtjen e pengjeve”.
Por jo të gjithë ndajnë të njëjtin qëndrim. Lideri i opozitës, Benny Gantz, akuzoi qeverinë për “sulme ndaj familjeve të pengjeve” ndërkohë që “mbajnë përgjegjësi për faktin që fëmijët e tyre janë ende të kapur prej gati dy vitesh”.
Nga ana tjetër, ministri i financave, Bezalel Smotrich, i krahut të djathtë ekstrem, e quajti protestën një “fushatë të dëmshme që luan në duart e Hamasit”.
Konteksti i luftës
Protesta erdhi pak më shumë se një javë pasi kabineti i sigurisë miratoi planin për pushtimin e qytetit të Gazës, ndërkohë që lufta ka hyrë në muajin e 22-të. Sipas Ministrisë së Shëndetësisë në Gaza, të paktën 61 mijë palestinezë janë vrarë, shumica civilë. Këto shifra nuk përfshijnë mijëra të tjerë që besohet të jenë ende nën rrënoja ose që kanë humbur jetën si pasojë indirekte e konfliktit.
Ndërkohë, Egjipti dhe ndërmjetës të tjerë po përpiqen të ringjallin bisedimet për një armëpushim 60-ditor që do të përfshinte lirimin e pengjeve. Por për momentin, Izraeli mbetet i ndarë mes atyre që kërkojnë vijimin e ofensivës dhe atyre që shohin në marrëveshje të vetmen rrugë për të shpëtuar jetë.
