Sot është e premte dhe mbase shumë prej jush do dalin për të ngrënë diçka të shpejtë. Nëse është më mirë të hash një hamburger të shoqëruar me patate apo dy hamburgera, do ua shpjegojë ky artikull në vijim.
Dietologia Emily Field sugjeron që në vend që të kategorizojmë ushqimet si “të këqija” ose “të mira”, duhet të fokusohemi në arritjen e ekuilibrit në vaktet tona. Kjo qasje sillet rreth tre lëndëve ushqyese kryesore: yndyrat, karbohidratet dhe proteinat.
Secila luan një rol vendimtar në dietën tonë – proteinat ushqejnë muskujt dhe na mbajnë të ngopur, karbohidratet sigurojnë energji dhe yndyrnat ndihmojnë në përthithjen e vitaminave dhe shëndetin e qelizave. Balancimi i këtyre lëndëve ushqyese ndihmon në minimizimin e dëshirave dhe ruan kontrollin mbi zakonet e të ngrënit, sipas Field.
Një studim i fundit në Nutritional Metabolism e përforcon këtë ide duke theksuar se si makronutrientët ndikojnë në nivelet e sheqerit në gjak. Yndyrnat dhe proteinat ngadalësojnë zbërthimin e karbohidrateve në sheqerna, duke u mbrojtur kundër luhatjeve të mprehta të nivelit të insulinës.
Për shembull, një vakt i pasur me karbohidrate dhe me pak proteina si një tas me drithëra mund të çojë në rritje të shpejtë dhe rënie të sheqerit në gjak, duke rezultuar në energji jetëshkurtër e ndjekur nga lodhje. Shtimi i proteinave dhe yndyrave, si kosi grek ose arrat, mund të ndihmojë në stabilizimin e këtyre niveleve.
Duke e zbatuar këtë në ushqimin e shpejtë, Field sugjeron se zgjedhja e dy burgerëve në vend të njërit shoqëruar me patate të skuqura mund të jetë një zgjedhje më e zgjuar. Ja pse: një hamburger tipik siguron rreth 300 deri në 400 kalori, me një përzierje të ekuilibruar të karbohidrateve, proteinave dhe yndyrave.
Në të kundërt, patatet e skuqura kryesisht ofrojnë yndyrë dhe karbohidrate me proteina minimale, duke kontribuar në përmbajtje të ngjashme kalorike, por më pak ekuilibër ushqyes.
Duke zgjedhur një hamburger shtesë, ju rritni marrjen e proteinave duke reduktuar yndyrën dhe karbohidratet e tepërta, të cilat mund të ndihmojnë në stabilizimin e niveleve të sheqerit në gjak dhe përmirësimin e ngopjes së përgjithshme. Field inkurajon të provoni këtë qasje për të parë se si ndikon në nivelin tuaj të energjisë dhe urisë.
