Europa duhet të përgatitet për një konflikt të mundshëm me Rusinë “në shkallën që përjetuan gjyshërit tanë”, paralajmëroi sekretari i përgjithshëm i NATO-s, Mark Rutte.
Deklarata e tij vjen mes rritjes së tensioneve në kontinent, pas hyrjeve të dronëve në hapësirën ajrore të NATO-s dhe deklaratës së Vladimir Putinit se Rusia është “gati për luftë tani”. Rutte theksoi se Rusia e ka rikthyer luftën në Europë dhe se vendet aleate janë objektivi i radhës, duke ngritur alarm për urgjencën e rritjes së shpenzimeve ushtarake dhe prodhimit të pajisjeve mbrojtëse.
Ai paralajmëroi se shumë shtete po i nënvlerësojnë rreziqet, duke besuar gabimisht se “koha është në anën tonë”, ndërsa realiteti është i kundërt. Deklaratat e tij erdhën në një moment kur bisedimet për paqe mes Ukrainës dhe Rusisë po ngecin, dhe SHBA kërkon që Europa të marrë më shumë përgjegjësi për sigurinë e saj.
Ndërkohë, vendet europiane raportojnë sulme të vazhdueshme kibernetike dhe shkelje të hapësirës ajrore, që konsiderohen pjesë e “luftës hibride” të Rusisë.
