Një rast i pazakontë në Prato ka tronditur Italinë: një grua 55-vjeçare nga Lombardia ka krijuar profile të rreme në Instagram për të zbuluar dhe turpëruar burra që i konsideronte tradhtarë. Veprimet e saj çuan në një sërë akuzash të rënda dhe në një dënim të ashpër nga gjykata.
Si nisi historia
Në vitin 2020, gruaja u paraqit në Instagram si një vajzë e re dhe kontaktroi një burrë 30-vjeçar nga Prato.
Bisedat nisën në mënyrë të zakonshme, por shpejt u kthyen në biseda erotike dhe shkëmbim materialesh intime.
Ajo ruajti të gjitha mesazhet dhe fotot dhe më vonë ia dërgoi partneres së burrit, miqve dhe kolegëve të tij, duke zbuluar të gjithë raportin virtual që ata kishin pasur.
Hakmarrje, jo shantazh
Hetimet treguan se gruaja nuk kërkoi para apo përfitime ekonomike.
Qëllimi i saj ishte thjesht “të ndëshkonte” meshkujt që mendonte se po tradhtonin partneret e tyre.
Sipas Corriere Fiorentino, ky rast ishte vetëm një nga disa raste të ngjashme që ajo kishte kryer më parë.
Denoncimi dhe vendimi i gjykatës
Çifti nga Prato vendosi ta denonconte rastin, duke hapur një hetim të plotë.
Në ditët e fundit, Gjykata e Pratos dha dënimet: 2 vite e 4 muaj burg për gruan 55-vjeçare për hakmarrje pornografike, shpifje, përndjekje dhe zëvendësim identiteti dhe 1 vit e 8 muaj burg për djalin e saj, i akuzuar se krijoi profilet e rreme dhe e ndihmoi në veprimet e saj. Vendimi është në shkallë të parë dhe mund të apelohet.
Si i zgjidhte viktimat?
Nuk është e qartë se si i përzgjidhte burrat që “targetonte“.
Hetuesit besojnë se viktimat zgjidheshin rastësisht dhe ajo përfitonte nga anonimiteti i rrjeteve sociale.
Asnjëherë nuk kërkonte para: skenari i saj përfundonte me zbulimin e tradhtisë te partnerja e burrit.
Nga online tek përndjekja fizike
Kur çifti vendoste të mos ndahej dhe iu drejtihej autoriteteve, gruaja e përshkallëzonte situatën. Sipas raportimeve, ajo fillonte ta ndiqte burrin fizikisht, herë pas here bashkë me të birin. Ata e fotografonin dhe e ndiqnin në distancë, derisa burri dhe partnerja e tij e kuptuan se po përndiqeshin. Ky moment çoi në identifikimin e saj dhe në finalizimin e hetimeve.
Një paralajmërim për rreziqet e rrjeteve sociale
Ky rast tregon qartë se si anonimati në internet mund të keqpërdoret.
Profilet e rreme dhe manipulimi emocional mund të kenë pasoja të rënda ligjore dhe psikologjike.
Rasti i Pratos mbetet një paralajmërim për të gjithë përdoruesit e rrjeteve sociale që të jenë të kujdesshëm me kontaktet e panjohura dhe të ruajnë privatësinë e tyre.
