Në vendet e rajonit, Kroacia ka pagën mesatare më të lartë, ndërsa Kosova ka pagën më të ulët. Këtë e tregojnë të dhënat zyrtare statistikore të zyrave statistikore të vendeve fqinje dhe të rajonit.
Paga mesatare mujore neto e paguar për punonjës në gusht në Kroaci, vendi i vetëm anëtar i BE-së nga rajoni, ishte 1,324 euro, që përfaqëson një rritje prej 11.8% krahasuar me të njëjtën periudhë të vitit të kaluar.
Në Mal të Zi, paga mesatare në maj 2024 ishte 832 euro, një rritje prej 4.9% krahasuar me të njëjtën periudhë të vitit 2023.
Në Serbi, paga mesatare është 96,649 dinarë serbë (824 euro), siç ka njoftuar Enti Republikan i Statistikave. Kjo shënon një rritje prej 14.6% krahasuar me të njëjtën periudhë të vitit të kaluar.
Statistikat zyrtare tregojnë se paga mesatare në Shqipëri në tremujorin e dytë të vitit 2024 është 75,114 lekë ose 763 euro, që paraqet një rritje prej 5.9% krahasuar me të njëjtin tremujor të vitit të kaluar. Sipas të dhënave publike, paga mesatare neto në Shqipëri është 608 euro.
Paga mesatare mujore neto e paguar në Bosnjë e Hercegovinë në gusht 2024 është 1,392 marka të konvertueshme ose 708 euro, që përfaqëson një rënie reale prej 0.8% krahasuar me korrikun e po atij viti.
Të dhënat e Entit Shtetëror të Statistikave të Maqedonisë së Veriut tregojnë se paga mesatare mujore neto e paguar për punonjës në gusht 2024 ishte 41,097 denarë (668 euro). Kjo është 12.9% më e lartë krahasuar me të njëjtin muaj të vitit të kaluar.
Në vendet e rajonit, Kosova ka pagën mesatare më të ulët, e cila sipas të dhënave të Agjencisë së Statistikave është 570 euro.
