Të thuash “jo” kur shefi juaj ju kërkon të merrni përsipër një detyrë shtesë është padyshim sfiduese, por ndonjëherë, është e nevojshme.
Ja se si të vendosni nëse do të thoni jo – dhe si ta bëni atë me takt.
Së pari, merrni një ditë për të menduar nëse detyra do t’ju ndihmojë apo do t’ju lëndojë.
Bëjini vetes disa pyetje: A do të mësoj diçka të re apo do të fitoj përvojë duke thënë “po”? A përputhet kjo detyrë me qëllimet e mia të karrierës në të ardhmen? Çfarë përvojash do të humbas nëse i them “po” kësaj detyre? A ndihem tashmë i mbingarkuar?
Përgjigjet e këtyre pyetjeve do të informojnë nëse jeni në gjendje të merrni përsipër punë shtesë.
Më tej, mos thoni thjesht “jo” – shpjegoni arsyen pse.
Nëse keni vendosur se thjesht nuk mund t’i thoni “po” kërkesës së shefit tuaj, jini transparent përse. Ndoshta nuk mund ta përfundoni detyrën ose projektin brenda kornizës kohore të kërkuar, nuk mendoni se keni burime për ta bërë punën me sukses, ose do t’ju duhet të neglizhoni përgjegjësi të tjera kryesore për ta kryer atë.
Cilido qoftë arsyetimi juaj, shpjegoni atë. Nëse keni të dhëna për të bërë rastin tuaj, përfshijini ato. Nëse menaxheri juaj ende ka nevojë që ju të përfundoni punën, ai duhet të rregullojë prioritetet tuaja – dhe pritshmëritë e tyre – në përputhje me rrethanat.
Burimi: Harvard Business Review
Përktheu dhe përshtati: Mendimi.al
