Disa shpërthime të forta kanë tronditur kryeqytetin e Ukrainës sonte, ndërsa kryebashkiaku i qytetit paralajmëroi për një natë “shumë të vështirë” përpara me trupat ruse që po afrohen.
Vitali Klitschko, ish-boksieri i peshave të rënda, i cili tani është kryebashkiak i Kievit, tha se pesë shpërthime u dëgjuan pranë një termocentrali në veri të qytetit.
“Situata tani – pa ekzagjerim – është kërcënuese për Kievin. Nata, afër mëngjesit, do të jetë shumë e vështirë,” tha ai.
Kjo vjen pasi presidenti i Ukrainës doli në rrugët e kryeqytetit për të mbledhur popullin e tij kundër pushtimit rus.
Në një video të postuar në internet këtë mbrëmje, Volodymyr Zelensky tha: “Ne jemi të gjithë këtu. Ushtria jonë është këtu. Qytetarët janë këtu. Ne jemi të gjithë këtu për të mbrojtur pavarësinë tonë, vendin tonë dhe kështu do të mbetet”.
Megjithatë, kishte një fije shprese pasi zëdhënësi i tij tha se qeveria ukrainase ishte në diskutime me Kremlinin për organizimin e një takimi.
Një zëdhënës i presidentit ukrainas Volodymyr Zelensky tha se Ukraina dhe Rusia po diskutojnë vendin dhe orën për bisedime me Rusinë.
Kremlini tha sot se presidenti Vladimir Putin ishte gati të dërgonte një delegacion në kryeqytetin e Bjellorusisë, Minsk, për bisedime me Ukrainën, pasi forcat ruse iu afruan Kievit në ditën e dytë të pushtimit nga Moska.
Ndërkohë, Moska thotë se marrëdhëniet e saj me Perëndimin janë afër një “rruge pa kthim” pasi disa vende vendosën sanksione gjithëpërfshirëse ndaj Rusisë për pushtimin e saj në Ukrainë.
“Ne kemi arritur në vijën pas së cilës fillon rruga pa kthim,” tha zëdhënësja e Ministrisë së Jashtme ruse Maria Zakharova në televizionin rus.
Burimi: The Telegraph
