Gruaja më e gjatë dhe më e shkurtër në botë u takuan në Londër për të shijuar një çaj pasdite dhe për të festuar Ditën e Rekordeve Botërore të Guinness.
Rumeysa Gelgi, e cila arrin një lartësi prej 215.16 centimetra, dhe Jyoti Amge, që është vetëm 62.8 centimetra, u takuan në hotelin prestigjioz Savoy Hotel, sipas një deklarate nga Rekordet Botërore të Guinness (GWR).
Pavarësisht diferencës së madhe prej 152.36 centimetra mes tyre, dyshja u shprehën se kaluan një kohë të mrekullueshme së bashku.
“Kemi disa gjëra të përbashkëta. Të dyja e duam make-up-in, kujdesin për veten, bizhuteritë dhe thonjtë e bukur,” tha Gelgi në deklaratë.
“Ishte e vështirë të bënim kontakt sy më sy për shkak të diferencës së lartësisë, por ishte e mrekullueshme,” shtoi ajo.
Amge, nga ana tjetër, shprehu lumturinë e saj për këtë takim të veçantë: “Jam shumë e lumtur që takova shoqen time rekordmbajtëse.”
Rumeysa Gelgi, një dizenjuese ueb-i nga Turqia, u konfirmua si gruaja më e gjatë që jeton në vitin 2021. Lartësia e saj është rezultat i një sëmundjeje të rrallë të quajtur sindroma Weaver, e cila prek vetëm një numër shumë të vogël njerëzish në botë. Deri më tani, ajo është personi i 27-të i diagnostikuar me këtë sindromë.
Gelgi, 27 vjeç, mban edhe disa rekorde të tjera Guinness, duke përfshirë:
- Duart më të mëdha të një gruaje me një gjatësi prej 24.93 centimetra,
- Shpinën më të gjatë të një personi (femër) me 59.90 centimetra,
- Veshët më të gjatë të një gruaje me një mesatare prej 9.58 centimetra.
Jyoti Amge, një aktore dhe personalitet mediatik nga India, mban rekordin si gruaja më e shkurtër në botë për shkak të një çrregullimi të rritjes së kockave të quajtur akondroplazi, që ndikon në zhvillimin e krahëve dhe këmbëve. Ky çrregullim ndodh gjatë zhvillimit të fetusit në barkun e nënës.
Pavarësisht shtatit të saj të vogël, Amge ka një prani të madhe në rrjetet sociale dhe ka marrë pjesë në serialin televiziv amerikan “American Horror Story: Freak Show,” ku luajti rolin e Ma Petite, duke u bërë aktorja më e shkurtër në histori, sipas GWR.
Ajo ka marrë pjesë gjithashtu në shfaqjen televizive italiane “Lo Show Dei Record” në disa raste.
