Gjykata Ndërkombëtare Penale (ICC) po kërkon urdhër-arrest për liderin e Hamasit, Yahya Sinwar dhe kryeministrin izraelit Benjamin Netanyahu, me akuza për krime lufte dhe krime kundër njerëzimit lidhur me sulmet e 7 tetorit në Izrael dhe konfliktin pasues të Gazës.
Prokurori i ICC-së, Karim Khan, synon gjithashtu ministrin e Mbrojtjes të Izraelit, Yoav Gallant dhe liderët e Hamasit, Mohammed Deif dhe Ismail Haniyeh. Ky veprim i paprecedentë e vendos Netanyahun përkrah figurave si presidenti rus Vladimir Putin, i cili gjithashtu përballet me akuza të ICC.
Netanyahu e dënoi vendimin, duke u zotuar të vazhdojë veprimet ushtarake derisa të lirohen të gjithë pengjet dhe të shpërbëhet Hamasi. Ky veprim mund të kufizojë udhëtimin ndërkombëtar për Netanyahun dhe Gallant, pasi vendeve anëtare të ICC do t’u kërkohet t’i arrestojnë dhe t’i ekstradojnë ata në Hagë.
Ndërkohë, shumë vende, veçanërisht anëtarët e BE-së, janë përmbajtur nga komentimi i drejtpërdrejtë i vendimit, duke shprehur respektin e tyre për pavarësinë e ICC-së.
Disa vende të BE-së, të cilat e mbështetën hapur urdhërarrestin për Putinin, kanë zgjedhur të heshtin për kërkesën në lidhje me Netanyahun dhe Gallantin.
Gjermania ka njoftuar se do ta arrestojë Benjamin Netanyahun nëse ai hyn në territorin gjerman, nëse Gjykata Ndërkombëtare Kriminale (ICC) lëshon një urdhër arresti për rolin e tij në konfliktin e Gazës që ka vrarë dhjetëra mijëra palestinezë. Zëdhënësi i kancelarit Olaf Scholz konfirmoi se Gjermania do të respektojë ligjin e ICC, pavarësisht kritikave për barazimin e liderëve izraelitë dhe të Hamasit.
Franca gjithashtu mbështet ICC dhe përpjekjet e saj, megjithatë përsëriti dënimin e saj për sulmet e Hamasit dhe shqetësimet e saj për shkeljet e mundshme të ligjit ndërkombëtar humanitar nga Izraeli. Ministria e Jashtme franceze theksoi pavarësinë e gjykatës dhe sqaroi se trupi i procedurës paraprake do të vendosë për urdhër-arrest bazuar në provat e prokurorit.
Ministrja e Jashtëm belge Hadja Lahbib përshëndeti dje vendimin e prokurorit të ICC-së për të kërkuar urdhra arresti për ata që janë përfshirë në “krime lufte” në Palestinë, si një “lëvizje të rëndësishme” për të hetuar situatën atje.
Përgjigja e komunitetit ndërkombëtar ndaj vendimit të ICC-së të 17 marsit 2023 në lidhje me arrestimin e presidentit rus Vladimir Putin dhe Khan të 20 majit 2024 për zyrtarët izraelitë duket se po përfaqëson një provë sinqeriteti.
Shtetet e Bashkuara dhe Britania e Madhe e kundërshtojnë fuqimisht kërkesën për urdhër-arrest kundër Netanyahut dhe Gallantit, ndërkohë që mbështesin veçanërisht urdhërarrestin për Putinin.
Netanyahu pretendoi se aplikimi i urdhër-arrestit ishte një “formë e re e antisemitizmit që lëvizte nga kampuset universitare në ICC“, ndërsa Presidenti Isaac Herzog argumentoi se kërkesa e Khan “kaloi kufirin” dhe përbënte një kërcënim për kolapsin e sistemit gjyqësor ndërkombëtar. .
Presidenti i SHBA Joe Biden e përshkroi kërkesën si “të turpshme” dhe Sekretari i Shtetit Antony Blinken theksoi refuzimin e tyre themelor të saj.
Në të kundërt, Biden e quajti të justifikuar urdhrin e arrestit të GJNP-së për Putinin, për të cilin ai tha se kishte “kryer qartë krime lufte”, dhe Blinken u kërkoi të gjitha shteteve anëtare të ICC të zbatonin vendimin.
Sipas raporteve në shtypin britanik, zëdhënësi i kryeministrit Rishi Sunak tha se urdhri i arrestit për Netanyahun nuk ndihmon në ndalimin e konfliktit, shpëtimin e pengjeve apo dhënien e ndihmës humanitare.
