Partia Laburiste ka bërë një rikthim triumfues në pushtet në Mbretërinë e Bashkuar pas më shumë se një dekade në opozitë, duke siguruar një fitore dërrmuese në një zgjedhje historike. Kjo fitore, megjithatë, vjen me sfida të rëndësishme pasi qeveria e re përballet me detyrën e rigjallërimit të një ekonomie në stanjacion dhe të adresimit të pakënaqësisë së gjerë.
Keir Starmer do të bëhet kryeministër
Lideri laburist Keir Starmer do të bëhet kryeministri i ri, duke marrë zyrtarisht pozicionin e ri sot. Ngjitja e tij shënon një rikthim dramatik për Laburistët, më pak se pesë vjet pasi pësuan një humbje të madhe. Në një fjalim para mbështetësve, Starmer pranoi përgjegjësinë e rëndë që shoqëron fitoren e tyre dhe theksoi nevojën për të rindërtuar besimin me elektoratin.
Fitorja historike e Laburistëve
Me pothuajse të gjitha rezultatet e numëruara, laburistët kanë siguruar 410 nga 650 vende në Dhomën e Komunave, ndërsa konservatorët kanë arritur vetëm 118. Kjo fitore dërrmuese sinjalizon një kërkesë për ndryshim në mesin e elektoratit, i cili është lodhur nga problemet ekonomike dhe skandalet politike.
Kush është Keir Starmer?
Kur Keir Starmer u zgjodh për të udhëhequr Partinë Laburiste të Britanisë në vitin 2020, pas humbjes më të keqe të partisë në zgjedhjet e përgjithshme në 85 vjet, ai u përpoq ta bënte partinë sërish të zgjedhshme nga elektorali.
Katër vjet më vonë, pas 14 vitesh sundimi konservator, Starmer mbërriti në 10 Downing Street si Kryeministri i ri. Ish-kryeministri Rishi Sunak pranoi të premten herët në mëngjes humbjen dhe i dorëzoi me shpejtësi dorëheqjen mbretit Charles III.
Keir Starmer, një ish-avokat 61-vjeçar i shpallur kalorës për shërbimet e tij ndaj drejtësisë penale, u përball me vite të tëra kritikash për mungesën e perceptuar të karizmës. Megjithatë, misioni i tij i palëkundur për të ripozicionuar laburistët drejt qendrës së politikës britanike dhe për të zgjeruar apelin e tyre ndaj votuesve ka dhënë rezultat.
Suksesi i Starmer kapitalizoi gjithashtu vështirësitë ekonomike dhe trazirat politike nën udhëheqjen e konservatorëve. Teksa merr rolin e Kryeministrit, Starmer ka për detyrë të trajtojë mosbesimin e përhapur te politikanët, normat e larta të varfërisë së fëmijëve dhe mbështetjen në rritje për politikën e ekstremit të djathtë dhe anti-imigruese në të gjithë Evropën.
Në fjalimin e tij të parë, ai theksoi nevojën për veprim kolektiv dhe u zotua se qeveria e tij do t’i jepte përparësi vendit ndaj partisë.
