Vajzat e “tradhtuara” të Afganistanit

Skenat e trishta nga Afganistani japin një mësim të fortë të vlerës së arsimit – dhe sa shpesh ai merret si i mirëqenë në botën e zhvilluar.

Vajzat afgane u panë në lot në dyert e shkollës pasi talebanët u tërhoqën nga premtimi që nxënëset femra të ktheheshin në arsim.

Vetëm disa orë pasi klasat u rihapën për herë të parë mbas shtatë muajsh, talebanët publikuan një njoftim duke thënë se shkollat do të mbeten të mbyllura për vajzat, duke përmendur një mosmarrëveshje për uniformat.

Shumë studentë u detyruan të ktheheshin në shtëpi, por një pjesë e vogël ndenjën për të protestuar jashtë shkollave të tyre.

Kthesa e papritur ngre frikën se të drejtat e grave dhe vajzave në Afganistan po zhbëhen nga talebanët.

Siç tha një student nga Kabuli për The Telegraph: “Mendova se talebanët kishin ndryshuar, por ata janë të pandryshueshëm. Më vjen shumë keq për 50% të popullsisë afgane që po përjashtohen nga të drejtat themelore të arsimit dhe punës”.

“Të gjitha vajzat kanë të drejtë për arsimim. Autoritetet kanë bërë deklarata të përsëritura në javët e fundit se do të rivendosin aksesin e vajzave në arsim në Afganistan. Sot, ne jemi të tmerruar që autoritetet nuk kanë përmbushur premtimin e tyre,” tha Hassan Noor Saadi, Drejtor Rajonal i Save the Children për Azinë.

“Çdo ditë që vajzat janë jashtë shkollës është një ditë që u mohohen të drejtat e tyre themelore njerëzore. Ne u bëjmë thirrje autoriteteve të anulojnë këtë vendim dhe të sigurohen që shkollat për vajza të hapen menjëherë.”

Burimi: The Telegraph