Studiuesit nga University College Cork në Irlandë kryen një studim për të zbuluar se çfarë ndodh brenda trupit kur ndaloni papritur konsumimin e kafesë. Studimi përfshiu një grup prej 62 personash, ku gjysma pinin rregullisht rreth tre deri në pesë filxhanë kafe në ditë, ndërsa gjysma tjetër normalisht nuk pinte fare. Ekipi shkencor ekzaminoi bakteret e zorrëve të tyre, metabolitët, gjendjen shpirtërore, nivelin e stresit, vigjilencën, si dhe aftësitë e të nxënit dhe kujtesës.
Pirësit e rregullt e ndërprenë fillimisht kafenë për dy javë, periudhë gjatë së cilës studiuesit matën ndryshimet në trupat dhe sjelljen e tyre. Më pas, kafja u rikthye në rutinë, por pjesëmarrësit nuk e dinin nëse po merrnin versionin me kafeinë apo atë dekafeinato.
Ndryshimi më i dallueshëm pas ndërprerjes u vu re në sistemin tretës. Metabolitët e zorrëve të pirësve të kafesë, të cilat janë substanca të vogla kimike të prodhuara ose të ndryshuara nga metabolizmi, pësuan ndryshime thelbësore në krahasim me ata të njerëzve që nuk pinin kafe normalisht.
Shkencëtarët zbuluan gjithashtu dallime në bakteret e zorrëve. Baktere të tilla si Eggerthella sp., të cilat mendohet se kontribuojnë në sekretimin e acidit në stomak dhe zorrë, ose Cryptobacterium curtum, që mund të marrin pjesë në prodhimin e acidit biliar, ishin më të bollshme te pirësit e kafesë krahasuar me ata që nuk e konsumonin atë.
Në momentin kur kafja u rikthye në përdorim, të dy grupet (si ai me kafeinë ashtu edhe ai pa kafeinë) raportuan më pak stres të perceptuar, rezultate më të ulëta në testet e depresionit dhe më pak impulsivitet. Meqenëse këto ndryshime pozitive ndodhën tek të dy llojet e kafesë, u arrit në përfundimin se efektet nuk ishin domosdoshmërisht të varura nga prania e kafeinës.
