A ka bërë presidenti amerikan gafën më të keqe të karrierës së tij duke kërkuar që lideri rus të hiqet për sulmin në Ukrainë?
Është e vështirë të dihet saktësisht se çfarë po mendonte Joe Biden ndërsa mbante fjalimin e tij në Poloni të shtunën.
Presidenti amerikan shpenzoi 27 minuta duke mbajtur atë që ishte padyshim fjalimi më i fuqishëm – dhe konsekuent – i presidencës së tij.
Përballë Kështjellës Mbretërore, një nga monumentet e dukshme të Varshavës, të dëmtuara gjatë Luftës së Dytë Botërore, ai thirri tmerret e së kaluarës jo shumë të largët të Evropës dhe u zotua se kontinenti nuk do të kthehej në ditët e tij më të errëta, pavarësisht nga lufta në Ukrainë.
“Për hir të Zotit, ky njeri nuk mund të qëndrojë më në pushtet,” tha ai, duke folur për arkitektin e mjerimit të Ukrainës – presidentin rus Vladimir Putin. Mesazhi i tij u prit me duartrokitje nga polakët dhe ukrainasit në audiencë, por në shtëpinë e tij, në Uashington të gjithë u habitën.
Brenda pak minutash, Shtëpia e Bardhë nxori një korrigjim – jo, SHBA nuk po kërkonte ndryshimin e regjimit në Moskë. Zoti Biden kishte gabuar disi.
Kjo gafë e Bidenit nuk do të jetë aq e lehtë për t’u harruar
Ndoshta administrata e tij ishte kaq e shpejtë për të reaguar sepse ka bërë shumë praktikë.
Nuk ishte hera e parë që shefi i tyre ishte jashtë skenarit, nuk ishte as hera e parë për këtë javë.
Gjatë udhëtimit të tij katër-ditor në Evropë, Shtëpisë së Bardhë i është dashur të korrigjojë disa nga komentet e komandantit të përgjithshëm 79-vjeçar.
Administrata sqaroi se SHBA “nuk do të” përdorte armë kimike pasi presidenti tha se vendi do t’i përgjigjej “në të njëjtën mënyrë” çdo sulmi kimik rus. Ata paralajmëruan gjithashtu se trupat amerikane nuk do të shkonin në Ukrainë pasi Biden i tha Divizionit të 82-të Ajror të stacionuar në Poloni për tmerret që ata “do të shihnin” në luftën fqinje.
Në janar, presidentit iu desh të qartësonte qëndrimin e tij për një luftë të mundshme në Ukrainë, duke u larguar nga komentet e konferencës së shtypit të ditës së mëparshme, gjatë së cilës ai sugjeroi se një “inkursion i vogël” do të shkaktonte një përgjigje më të vogël sesa një pushtim në shkallë të plotë të vendit.
Dmytro Kuleba, Ministri i Jashtëm i Ukrainës, kritikoi komentin më vonë duke thënë se një vend “nuk mund të jetë gjysmë i pushtuar”.
Shumë nga gafat e zotit Biden mund të fshihen. Por kjo nuk do të jetë aq e lehtë për t’u harruar.
Burimi: The Telegraph
