Putin kërcënon me një raketë të re bërthamore që mund të godasë Britaninë brenda tre minutave

Tensionet përshkallëzohen ndërsa lideri rus paralajmëron se do të lëshojë një armë balistike ndërkontinentale, me nofkën “Satani II”.

Vladimir Putin paralajmëroi se Rusia do të zhvillojë raketën e saj më të re balistike ndërkontinentale, e aftë për të arritur Britaninë në tre minuta, deri në fund të vitit.

Presidenti rus, i cili të martën priti të diplomuarit e akademisë ushtarake në një ceremoni luksoze në Kremlin, tha se vendi i tij do të vazhdojë të rrisë aftësitë e tij ushtarake që janë dëmtuar nga humbjet në Ukrainë.

“Ne do të vazhdojmë të zhvillojmë dhe forcojmë forcat tona të armatosura, duke marrë parasysh kërcënimet dhe rreziqet e mundshme ushtarake,” tha ai, duke përshëndetur trupat ruse në Ukrainë që luftuan “me guxim dhe profesionalizëm si heronj të vërtetë”.

“Nuk ka dyshim se do të jemi edhe më të fortë,” shtoi ai.

Raketa, e njohur gjithashtu si Satan II, ka një rreze veprimi prej 18,000 kilometrash (11,000 milje) dhe mund të lëshojë nga 10 deri në 15 koka bërthamore me një shpejtësi hipersonike, duke anashkaluar shumicën e sistemeve të radarëve dhe mbrojtjes nga raketat.

Gjeneral koloneli Sergei Karakayev, komandanti i forcave raketore strategjike të Rusisë, tha për televizionin shtetëror rus muajin e kaluar se raketat Sarmat mund të fluturojnë në trajektore të ndryshme, duke shmangur mbrojtjen ndaj raketave të armikut.

“Nuk ka mbrojtje ajrore ekzistuese për sistemet raketore Sarmat dhe ndoshta nuk do të ekzistojë deri në dekadat e ardhshme”, tha ai.

Shtesa të tjera të reja të mëdha në arsenalin rus do të përfshijnë sistemet e mbrojtjes raketore S-500 që, sipas Putinit, “janë të pakrahasueshëm në botë“.

Kjo erdhi pasi një prezantues televiziv rus paralajmëroi në maj se Rusia mund ta “mbysë” Britaninë “një herë e përgjithmonë” me një sulm raketor bërthamor ose një silur që do të dërgonte një tsunami radioaktiv.

Dmitry Kiselyov, një ekzekutiv i televizionit shtetëror dhe një nga propagandistët më famëkeq të Rusisë, tha në një episod të emisionit të tij të përjavshëm se ishujt britanikë janë “aq të vegjël sa një raketë Sarmat do të mjaftojë për ta fundosur njëherë e përgjithmonë“.

Në segmentin tjetër, plot grafika të krijuara nga kompjuteri, prezantuesi i televizionit tregoi se si një torpedo rus Poseidon mund ta “zhysë Britaninë në thellësi të detit“.

Rusia testoi me sukses Sarmat në prill mes luftimeve të ashpra në Ukrainë, duke rritur mundësinë e një konfrontimi bërthamor me Perëndimin.

Vetëm muajin e kaluar, kreu i Roscosmos, agjencia ruse hapësinore, paralajmëroi Perëndimin se nëse nuk “bisedojnë me mirësjellje” me Kremlinin, Rusia do të përdorë raketa Sarmat.

Dmitry Rogozin, i cili është gjithashtu një aleat i ngushtë i Putinit, e përshkroi Sarmat si “raketën bërthamore më të fuqishme në botë” dhe mburrej se mund të shkatërrojë “gjysmën e bregut të një kontinenti” të një armiku të Rusisë.

Burimi: The Telegraph