Një konsorcium prej 16 agjencish lajmesh po themelon Redaksia Europiane, një hapësirë për korrespondentët për të punuar dhe trajnuar së bashku në Bruksel me synimin për të prodhuar dhe shpërndarë lajme mbi çështjet e BE-së thuhet në një komunikatë për shtyp nga Komisioni Europian në dhjetor të 2021.
Krahas raportimit të tyre të rregullt, korrespondentët e agjencive do të prodhojnë së bashku përmbledhje lajmesh dy herë në javë, duke ushqyer kanalet e lajmeve dhe kanalet e shpërndarjes së njëri-tjetrit, dhe për këtë arsye duke ofruar një perspektivë pan-evropiane mbi çështjet e BE-së për audiencën në të gjithë kontinentin. Ata do të krijojnë një qendër fizike të prodhimit të lajmeve në Bruksel nga e cila do të ofrojnë gjithashtu trajnime për agjencitë pjesëmarrëse (mbi sigurinë kibernetike, kontrollin e fakteve dhe multimedian), si dhe shërbime shtesë anësore (axhenda e ngjarjeve, hapësirë e përbashkët për intervista të përbashkëta, akreditim shërbimi, etj.). Në fund të fundit, projekti ka potencialin për të përmirësuar bashkëpunimet dhe standardet gazetareske në Evropë.
Redaksia Europiane të agjencive të lajmeve në Bruksel është një projekt i drejtuar nga një konsorcium prej 16 agjencish lajmesh të koordinuara nga Agjencia Gjermane e Shtypit (dpa), që mbulon 11 shtete anëtare të BE-së, si dhe katër vende kandidate ose kandidate potenciale. Partnerët janë: dpa (Gjermani), AFP (Francë), Agerpres (Rumani), ANSA (Itali), APA (Austri), Belga (Belgjikë), BTA (Bullgari), Europapress dhe EFE (Spanjë), HINA (Kroaci), STA (Slloveni), TASR (Sllovaki), ATA (Shqipëri), FENA (Bosnje-Hercegovinë), MPB (Republika e Maqedonisë së Veriut), Tanjug (Serbi).
Projekti do të nisë në janar 2022. Konsorciumi do të fillojë të rekrutojë ekipin qendror editorial, të zhvillojë mjetet përkatëse të koordinimit të Teknologjive të Informacionit dhe të nënshkruajë kontrata përdorimi ndërmjet agjencive, ndërsa do të eksplorojë opsionet për konfigurimin fizik të projektit. Redaksia Europiane do të hapet dhe do të publikojë artikujt e parë gjatë verës së vitit 2022. Financimi i Komisionit Evropian do të mbulojë funksionimin e saj deri në fund të vitit 2023 (24 muaj në total) thuhet në komunikatë.
Projekti i Redaksisë Europiane u zgjodh pas një thirrjeje të hapur për propozime, si pjesë e veprimeve multimediale të Komisionit Evropian. Atij iu dha një grant prej 1.76 milionë euro. Objektivi kryesor i thirrjes, i nisur në qershor 2021, është të rrisë prodhimin, kurimin dhe qarkullimin e përmbajtjes mediatike profesionale dhe shumëgjuhëshe të lajmeve që mbulojnë çështjet e BE-së.
Burimi: KE
