Një tërmet me magnitudë 5.9 goditi Turqinë lindore të mërkurën në mëngjes, por sipas zyrtarëve nuk janë raportuar viktima të menjëhershme apo dëme të konsiderueshme.
Tërmeti ndodhi në 10:46 të mëngjesit me orën lokale në rrethin Kale, në provincën Malatya. Kjo zonë u ndikua rëndë nga tërmeti shkatërrues me magnitudë 7.8 ballë i 6 shkurtit 2023, i cili mori jetën e më shumë se 53,500 njerëzve në Turqi dhe gati 6,000 njerëzve në Siri.
Agjencia AFAD e menaxhimit të fatkeqësive raportoi në platformën e mediave sociale X (ish Twitter) se, për momentin, “nuk ka pasur humbje jetësh apo shkatërrim pronash” si pasojë e tërmetit.
Menjëherë pas kësaj, Ministri i Brendshëm Ali Yerlikaya deklaroi se tre ndërtesa ishin “shembur pjesërisht” në zona të ndryshme dhe shërbimet e urgjencës kishin marrë disa dhjetëra thirrje për ndihmë.
Zyrtarët lokalë në Malatya gjithashtu konfirmuan se nuk kishte “zhvillime negative” në këtë pikë. Megjithatë, guvernatori i provincës njoftoi se të gjitha shkollat fillore dhe të mesme në rajon do të qëndrojnë të mbyllura gjatë ditës si masë paraprake.
Lëkundjet u ndjenë fuqishëm në disa qytete të mëdha në rajon, duke përfshirë Diyarbakir, që ndodhet rreth 140 kilometra në juglindje të Kale, siç raportohet nga korrespondentët e AFP.
Tërmeti u ndje gjithashtu në pjesë të Sirisë, Gjeorgjisë dhe Armenisë, sipas agjencisë shtetërore të lajmeve të vendit.
Pamjet e transmetuara nga televizioni turk treguan banorët në qytete të ndryshme duke nxituar në rrugë në përgjigje të lëkundjeve.
