Joe Biden të premten mbrëma paralajmëroi për “pasoja” nëse Pekini i jep armë Rusisë për të ndihmuar pushtimin e saj në Ukrainë.
Përparimi i Vladimir Putin ngeci mes rezistencës intensive të Ukrainës, ndërsa më shumë armë perëndimore u derdhën në vend.
Ministria ruse e mbrojtjes pretendoi se po “shtrëngonte lakun” në qytetin e Mariupolit pasi forcat speciale çeçene filmuan veten duke qëlluar në blloqe banimi dhe kryebashkiaku raportoi për beteja me armë në qendër të qytetit të rrethuar.
Shefi i inteligjencës së mbrojtjes në Mbretërinë e Bashkuar paralajmëroi se Rusia kishte kaluar në një strategji të “shkatërrimit“, që do të thotë se më shumë civilë do të vdesin. Ai tha se kjo do të nënkuptonte “përdorim të pamatur dhe pa dallim të fuqisë së zjarrit” nga rusët.
Në Moskë, Putin u shfaq në një tubim, ku stadiumi ishte mbushur plot me përkrahës që valëvitnin flamurin dhe brohoritnin dhe u tha atyre: “Ne nuk kemi pasur një unitet të tillë si ky që kemi tani, për një kohë të gjatë“.
Negociatorët rusë pretenduan se ishin “në gjysmë të rrugës” për një marrëveshje sipas së cilës Ukraina do të angazhohej të bëhej neutrale dhe të mos bashkohej kurrë me NATO-n.
Sistemi satelitor Starlink i Elon Musk po ndihmon forcat ukrainase të fitojnë luftën me dron, pasi ata përdorin teknologjinë në përpjekjet e tyre për të gjurmuar dhe vrarë rusët pushtues.
Media shtetërore kineze ka filluar të raportojë për viktimat civile në luftën e Ukrainës si pjesë e një largimi delikat nga narrativa pro-ruse.
Grupet në Facebook u detyruan të kufizojnë numrin e njerëzve që kërkonin të strehonin refugjatë ukrainas pasi skema e sponsorizimit të qeverisë pati një lum aplikimesh që ditën e parë.
