Një shtresë e trashë portokalli mbulon vendin teksa ekspertët thonë se fenomeni do të bëhet më i shpeshtë për shkak të thatësirës dhe rënies së reshjeve
Iraku u mbulua sërish me një shtresë të trashë portokalli të dielën, pas një seri stuhish pluhuri që janë bërë gjithnjë e më të zakonshme.
Dhjetëra janë shtruar në spital me probleme të frymëmarrjes në qendër dhe në perëndim të vendit.
Një shtresë e trashë pluhuri portokalli ka mbuluar rrugët dhe automjete, duke depërtuar në shtëpitë e njerëzve në kryeqytetin Bagdad.
Fluturimet u ndaluan për shkak të shikueshmërisë së dobët në aeroportet që i shërbejnë Bagdadit dhe qytetit të shenjtë shiit të Najafit, me fenomenin që pritet të vazhdojë, sipas shërbimit të motit.
Iraku u godit nga një seri stuhish të tilla në prill, duke bllokuar fluturimet në Bagdad, Najaf dhe Arbil dhe duke lënë dhjetëra të shtruar në spital.
Amer al-Jabri, i zyrës meteorologjike të Irakut, tha më parë se fenomeni i motit pritet të bëhet gjithnjë e më i shpeshtë “për shkak të thatësirës, shkretëtirëzimit dhe rënies së reshjeve“.
Iraku është veçanërisht i prekshëm ndaj ndryshimeve klimatike, duke qenë tashmë dëshmitar i reshjeve rekord të ulëta dhe temperaturave të larta në vitet e fundit.
Ekspertët kanë thënë se këta faktorë kërcënojnë të sjellin fatkeqësi sociale dhe ekonomike në vendin e plagosur nga lufta.
Në nëntor, Banka Botërore paralajmëroi se Iraku mund të pësojë një rënie prej 20% të burimeve ujore deri në vitin 2050 për shkak të ndryshimeve klimatike.
Në fillim të prillit, Issa al-Fayad, një zyrtar i ministrisë së mjedisit, kishte paralajmëruar se Iraku mund të përballet me “272 ditë pluhuri” në vit në dekadat e ardhshme, sipas agjencisë shtetërore të lajmeve INA.
Burimi: The Guardian
