Zyra e Prokurorit të Përgjithshëm të Nju Jorkut tha në dosjet gjyqësore të martën vonë se ka gjetur prova “të rëndësishme” që sugjerojnë se kompania e ish-presidentit Trump ka kryer mashtrim dhe i kërkoi një gjyqtari shtetëror të urdhërojë Trump dhe dy nga fëmijët e tij të dëshmojnë në hetim.
Gjatë vitit të kaluar, zyra e Prokurorit të Përgjithshëm tha në çështjen e hapur se hetimi “ka zhvilluar prova të rëndësishme shtesë që tregojnë se Organizata Trump përdori vlerësime mashtruese ose çorientuese të aseteve për të marrë një mori përfitimesh ekonomike, duke përfshirë huatë, mbulimin e sigurimeve dhe zbritjet tatimore.”
Prokurori deklaroi se hetimi është në vazhdim dhe nuk ka asnjë përcaktim përfundimtar nëse do të akuzohet kompania për mashtrim.
Zyra e prokurorit pretendoi në një mocion për të detyruar ish-presidentin dhe fëmijët e tij të dëshmonin për shkak se Organizata Trump gënjeu për disa nga vlerat e pronës së kompanisë dhe rriti vlerën e një klubi golfi në Nju Jork për përfitime financiare. Shifrat e fryra supozohet se e ndihmuan kompaninë të merrte kushte më të mira kredie dhe të lehtësonte barrën e saj tatimore. Fëmijët e ish-presidentit kanë qenë të gjithë të përfshirë nga afër në transaksionet në fjalë, tha Prokurorja e Përgjithshme e Nju Jorkut, Letitia James.
James po përpiqet të detyrojë për të dëshmuar Trump dhe dy prej fëmijëve të tij, Donald Trump Jr. dhe Ivanka Trump. Djali tjetër, Eric Trump, ka dëshmuar tashmë në prokurori.
Trump Jr. drejton kompaninë familjare me vëllain e tij, ndërsa Ivanka Trump ishte nënpresidente ekzekutive e saj për zhvillim dhe blerje deri të paktën në vitin 2016.
“Kështu që ne nuk do të tolerojmë përpjekjet e tyre për t’iu shmangur dhënies së dëshmisë në këtë hetim” tha prokurori i përgjithshëm. “Ne nuk do të pengohemi në përpjekjet tona për të vazhduar këtë hetim, për të zbuluar faktet dhe për të ndjekur drejtësinë, pavarësisht sa postblloqe z. Trump dhe familja e tij hedhin në rrugën tonë”.
Trump dhe familja e tij kanë thënë në të kaluarën se hetimi është i motivuar politikisht. Donald Trump Jr. tha në një postim në Twitter të mërkurën në mëngjes se hetimi i James “nuk është asgjë më shumë se një ndëshkim politik nga ajo në emër të të gjithë Partisë Dem”, duke shtuar se ajo duhet të shkarkohet.
Burimi: The Hill
