Presidenti i Ukrainës ka akuzuar NATO-n se i ka dhënë një “dritë jeshile” bombardimeve ruse, sepse aleanca refuzon të vendosë një zonë ndalim-fluturimi mbi vendin e tij.
NATO hodhi poshtë të premten kërkesën e Kievit për të krijuar një zonë ndalim-fluturimi mbi Ukrainë, mes frikës se kjo mund të tërhiqte vendet perëndimore në konflikt të drejtpërdrejtë ushtarak me Rusinë.
Volodymyr Zelensky e sulmoi mbledhjen e NATO-s si “të dobët” dhe “të hutuar” dhe tha se aleanca e dinte se agresioni i mëtejshëm rus ishte i mundshëm.
Ai akuzoi NATO-n se kishte gjak në duart e saj.
“Të gjithë njerëzit që vdesin duke filluar nga sot do të vdesin gjithashtu për shkakun tuaj. Për shkak të dobësisë suaj, për shkak të shkëputjes suaj,” tha Zelensky.
“Sot lidershipi i aleancës dha dritën jeshile për bombardime të mëtejshme të qyteteve dhe fshatrave të Ukrainës, duke refuzuar krijimin e një zone ndalim-fluturimi”.
Të premten, Sekretari i Përgjithshëm i NATO-s, Jens Stoltenberg, paralajmëroi se futja e një zone të ndaluar fluturimi mund të çojë në një “luftë të plotë në Evropë, duke përfshirë shumë më tepër vende dhe duke shkaktuar shumë më tepër vuajtje njerëzore”.
Sekretari amerikan i Shtetit Antony Blinken gjithashtu përjashtoi futjen e një zone të ndaluar fluturimi, por tha se është i bindur se Ukraina mund ta fitojë luftën e saj me Rusinë.
“Nuk mund t’ju them se sa do të vazhdojë kjo,” tha kryediplomati amerikan. “Nuk mund t’ju them se sa kohë do të zgjasë. Por ideja që Rusia mund t’i nënshtrojë vullnetit të saj 45 milionë njerëz që po luftojnë me zjarr për të ardhmen dhe lirinë e tyre.”
Ndërsa pushtimi rus i Ukrainës hyn në ditën e dhjetë, forcat e Moskës vazhdojnë të bombardojnë shumë qytete.
Në qytetin port juglindor të Mariupolit, kryetari i bashkisë së qytetit ka thënë se banorët janë nën një “bllokadë” pas ditëve të sulmeve “të pamëshirshme” nga forcat ruse, të cilat kanë bërë ndërprerjen e energjisë dhe ujit për 450,000 banorë.
Burimi: The Telegraph
